ملاحظات حول التسجيل في الجامعات التركية 2022 – 2023 – 2024

ماهي الشروط المعروفة للتسجيل في الجامعات التركية؟

معظم الجامعات تشترط على الطالب أن يكون معدله (170 من 240)، والبعض يشترط معدل (185 من 240) طبعًا كله كحد أدنى للتسجيل، وليس للقبول في تخصص ما. معظم الجامعات التركية تشترط على الطالب أن يكون معدله ما فوق ال70% والبعض ما فوق 75%. ليس كل جامعة تقدم فيها ستحصل فيها على قبول جامعي (حتى لو مسجل معهد رقص شرقي أو طباخ أو صناعة تبغ)، لذلك كن مستعد للرفض أو القبول مهما كانت التخصصات.

على الهامش!

كتير من الطلاب معدلاتها دون ال60% و هدول صراحة كتير رح يتعذبوا حتى يحصلوا على قبول جامعي، وخاصة الي بتكون أعمارهم كبيرة! ونذكّر القبول غير مستحيل ولكن يحتاج صبر ومتابعة جدًا جدًا.. ( التسجيل في الجامعات ليس كـ كبسة زر وانتهى!)

مثال: حاليًا عندي طلاب معدلاتهم 42% و 45% و 50% و 60%، شريحة كبيرة من الطلاب عم تكون معدلاتهم ما بين ال45% لل 60%.
لذلك وللأمانة بهيك معدل مارح يوصل قبول فورًا بده شغل كتير وتسجيل بأكبر عدد ممكن من الجامعات.
والنصيحة، التسجيل فقط بالتخصصات المسائية المأجورة ( يكون الضغط عليها أقل وتكون تكلفتها المادية أكثر من الصباحية).

في طلاب نصيبهم جيد وتوفيق من رب العالمين ممكن الطالب يسجل ب 6 جامعات ويحصل على القبول وبكون معدل الثانوية ما فوق الـ 60% و بيرتاح فورًا، ويننتظر مفاضلة التعليم المفتوح. كل طالب معدله ما فوق ال75% بإذن الله بيحصل على قبول جامعي ما في داعي للقلق والخوف، فقط شوية صبر ومتابعة بأمور التسجيل والتحلي بالصبر.

أخي الطالب/ة لديك وقت من هذه اللحظة حتى بداية الشهر التاسع حتى تحصل قبول جامعي وتثبت وتحصل على وثيقة الطالب وتستعد للتسجيل في التعليم المفتوح من خلال هذا القيد الجامعي!
لا تفقد الأمل!! في فرصة للقبول.

أصحاب المعدلات الي دون الـ 70% عليكم التسجيل بالتعليم المسائي وهو التخصص بكون بآخرو موجود هاد الرمز “İÖ” وبالإنكليزية بكون مكتوب هيك “EP” الفرق بين التعليم العادي والتعليم المسائي. التعليم الصباحي بكون للطلاب السوريين مجاني بعدد قليل جدًا جدًا من الجامعات وتكون رسومه حسب التخصص والجامعة أي ما يقارب 2000 ليرة تركية أقل أو أكثر.
أما التعليم المسائي بكون أيضًا مأجور بما يقارب 3000 ليرة تركية تقريبًا أكثر أو أقل حسب الجامعات. وطبعًا الأجور تدفع أثناء التثبيت.
التعليم المسائي فيني شبهو بالتعليم الموازي الي بسوريا بكون هيك وصلت الفكرة وبتكون نسبة القبول فيه جيدة لأصحاب المعدلات المنخفضة.

عزيزي الطالب من حصلت على قبول ثبّت فيه فورًا وخبرنا بتجربتك وقت التثبيت حتى نفيد بقية الطلاب، وكمان يجب عليك إيقاف عملية التسجيل ببقية الجامعات التركية حتى يصير فرصة لبقية الطلاب بالقبول.

تذكّر أذا بدك تدرس بالتعليم المفتوح تخصص وتكون دراسته 4 سنوات يجب عليك التسجيل بالتعليم العادي تخصص دراسته 4 سنوات وإن أردت دراسة معهد سنتين فسجل معهد سنتين..

تذكّر موضوع الترجمة+النوترة ضروري جدًا للشهادة، والموضوع الأهم من ذلك هو معادلة الشهادة “دنكليك” يجب عليك فورًا تشتغل بموضوع تعديل الشهادة.

شرح حول كيفية تعديل الشهادة الثانوية لمعرفة التفاصيل:

https://alinebhen.org/diploma-tasdik/

عزيزي الطالب! لا تقطع أملك سجل وتوكل على الله وممكن تزبط وتتسير معك حتى لو معدلك قليل.

الطلاب المفتوح أو عن بعد قد يخولك للحصول على الجنسية التركية في المستقبل، بعد دخولك للجامعة فقط حدث بياناتك في الهجرة التركية.

بدك تريح راسك وقلبك وفورًا بدك قبول جامعي؟ سجل تخصص بالتعليم المسائي غالبًا بتم القبول إذا كان معدلك ما فوق ال70%، هي إذا كنت مستعجل وما عندك صبر.

موضوع التسجيل في الجامعات بده رواق وصبر وتحمل وممكن توصل لدرجة الرفض ب 5 جامعات وممكن 10 وممكن 20 جامعة، لهيك بدك تكون صبور كتير أخي الطالب والتوفيق من رب العالمين.

اذا كان معك امتحان اليوس YÖS وكان معدلك جيد ما فوق الـ 40% كمان هاد الشيء بساعدك بالحصول على القبول بفرصة نوعًا ما جيدة.

تنويه هام:

يا جماعة أنا والله بحب وأحب لقلبي أساعد الجميع وأرد على أسئلة الجميع وبكل قوة وإرادة ولكن أنا كمان بالنهاية إنسان وعندي طاقة للرد على الاسئلة والاستفسارات مو جهاز آلي! وعندي التزامات وحياتي الخاصة، والبعض بنزعج وبحكي كلام مشكل ملون والبعض بشتم وبحظر و….

ياريت فقط كل واحد فينا يقدر شوي، أنا بالنهاية لا بعرفك ولا بتعرفني ولا في سبب حتى اتجاهل رسالتك أو مارد عليك، وأنا حاليًا بعتذر من كل طالب حتى خليته ينتظرني ولكن هاد الشيء مو بأيدي غصب عني، والبعض ما عم يفهم هي النقطة..

شو ممكن يسجلوا الطلاب الي معدلاتهم دون الـ 70؟

ننصح الطلاب الي معدلاتها دون الـ 70 باختيار المعاهد التي تدرس سنتين، فرصة قبولهم في الكلية رح يكون متعب وممكن ما يتم القبول أبدًا لانه المعدل دون الوسط، مع ذلك ممكن المحاولة والتسجيل كلية! ولكن لا تتفاجئوا إن ما طلعلكن قبول كلية 4 سنين، كرمال ماتقولوا محدا نصحنا ولا أرشدنا إنه معدلنا ما بحصل كلية!

وحتى لو سجلوا معاهد سنتين محدا يظن من الطلاب إنو قبوله رح يكون مضمون 100%، لن يكون مضمون ابدًا للاسف ولكن أضعف الايمان أصحاب المعدلات القليلة تسجل معهد وتصبر حتى تحصل قبول!.

بحال كان الطالب معدله دون الـ 70 ولديه امتحان يوس! هل يشمله هذا الكلام؟!

الجواب لا أبدًا، وبإمكانو تسجيل كلية 4 سنوات أو معهد سنتين كون لديه امتحان يوس ففرصته بالقبول تكون أكبر بكثير من الطلاب التي لديها فقط ثانوية.

شو ممكن يسجلوا الطلاب الي معدلاتهم مافوق الـ 70؟

الطلاب الذين معدلاتهم مافوق ال70 بإمكانهم اختيار التسجيل كلية 4 سنوات أو معهد سنيتن. وأكرر لا يوجد ضمان في القبول، وكونوا مستعدين لفكرة قد يتم الرفض وقد يتم القبول، ولكن لا تقلقوا إن كان معدلكم مافوق ال70. بتحصلوا على قبول ولكن الأمر بحاجة لصبر، وإن كان لديكم يوس يكون أفضل بكثير ويزيد من فرصة القبول.

ما الحل النهائي لأصحاب المعدلات القليلة جدًا؟

الحل النهائي لأصحاب المعدلات القليلة جدًا، إن فقدوا الأمل من قبولهم في الجامعات الحكومية، الحل النهائي هو حصول الطالب على قيد في جامعة خاصة وتكلفة الجامعات الخاصة تقريبًا للمعاهد تتجاوز الـ 2000$، والكليات تتجاوز الـ 3500$. ويختلف الأمر من شركة لشركة وما العقود المتوفرة لديها.