” بدون جنسية ما طلعلنا شي مع جنسية بدو يطلع ????”

” بدون جنسية ما طلعلنا شي مع جنسية بدو يطلع ????“

صديقي .. مين خبرك انه الجنسية التركية رح تحققلك احلامك الوردية
وتدخلك الجنة بدون حساب ؟
وتدخلك الجامعة الي تتمناها والتخصص الي تتمناه ؟
مين خبرك انه الجنسية التركية رح تعملك كائن حي آخر وكانك جاي من كوكب زحل والمشتري ؟
مين قلك انك رح تتعامل 100% كـ تركي الجنسية ؟؟
وكل شوي بجي سؤال أي أنا معي جنسية ! ولازم هيك وهيك وهيك و……………. يا جماعة فهمانين موضوع الجنسية التركية غلط أنتو ..
مو يعني أخدت الجنسية التركية خلص صرت مواطن تركي متلك متل الاتراك.
رح أحكي كم نقطة مهمة من جهة الامور التعليمية وكم نقطة مهمة ولازم تتعرفوا عليهم وتصححوا معلوماتكم .

أولاً :

بخصوص التسجيل على الجامعة مافيك تسجل متلك متل الاتراك ..
بدك تسجل متلك متلهم بدك تقدم إمتحان YKS ووقتها متلك متل اي طالب تركي بتدخل جامعة أعتماداً على معدلك بهادا الامتحان .
YKS (YÜKSEKÖĞRETİM KURUMLARI SINAVI)
امتحان بدخل عليه الطالب بعد ما يخلص بكالوريا من أجل القبول في الجامعات التركية أي يعني امتحان قبول للطلاب الاتراك في الجامعات ، لانه لايمكن دخول الطلاب بدون هادا الامتحان.
—
ثانياً :

التسجيل على الجامعات التركية للحاصلين على الجنسية التركية
رح يكون الطلب هو “مزدوج الجنسية” “çift vatandaşlık” رح يتوضح يعني ضمن طلب التسجيل انه الطالب حاصل على جنسية سورية و تركية .
وهاد الشيء ممكن يزيد من نسبة قبوله .
وأثناء القبول يحق له التثبيت من خلال أحد الجنسيتين .
—
ثالثا:

المفاضلات على الجامعات التركية اذا ما دخلت لامتحان الـ YKS مفاضلاتك مع الاجانب يعني المفاضلات العادية المعروفة .
—
رابعاً:

رسوم الدراسة في الجامعات معظم الجامعات للدوام الصباحي مجاناً والدوام المسائي مأجور .
—
خامساً :

بس حصلت على الجنسية التركية كل شيء منح مخصصة للاجانب ماعاد فيك تسجل فيها ولا تستفيد منها لهيك محدا يتعذب .
—
سادساً :
يوجد منحتين لطلاب الاتراك .
منحة مالية من الدولة معروفة باسم KYK راتبها 500 ليرة.
منحة مالية من مديرية الاوقاف التركية راتبها 250 ليرة.
هدول المنح المعروفة والموجودة والسنة الماضية قبل عدد جيد من الطلاب فيهم سوريين حاصلين على الجنسية التركية .
—
سابعاً :
العمل بعد التخرج رح تدخلوا مسابقة العمل كما متعارف عليها بسوريا
وهون بتركيا في امتحان للتوظيف من قبل الدولة ومعروف باسم KPSS.
من خلاله بتم توظيفك في الدولة .
طبعاً حسب معدلك بتم توظيفك .
يا اما بتروح بتقدم طلب توظيف بالشواغر القطاع العام او الخاص .
يعني باختصار متلك متل اي مواطن تركي من هي الجهة .
—
هدول أهم النقط الي الطلاب ما بتعرف عنها ..
مبروك حصولك على الجنسية التركية ولكن حصولك على الجنسية ببعض الامور مارح تكون مثل المواطن التركي تبقى بالنهاية مواطن مزدوج الجنسية والاغلب حسب على الجنسية بقرار “رئاسي استثنائي”.

حبيت فيدكم بهي المعلومات والتفاصيل .
بتمنى للجميع الخير والتوفيق وأعتذر لو كان الكلام قاسي أو مدري كيف وشكراً .
—